الشاعر مصطفى ابراهيم

انا و انتى عشنا سوا...
أيام... يمكن ما تتعوّضش من تانى..
شفنا التاريخ و هو بيتكتب ع الهوا...

و سبنا الهوى يضربنا ف الخلاّط...
معرفش بكتبلك من الإحباط...
ولّا الأمل...
معرفش إيه العمل....
ف ريحتك اللى مغرقة ورق النتيجة...
و ف الأيام المتعلّمة بمزيكا...
و ف الشال اللى شال دخنة و شياط و عياط
و فوارغ المطاط ..
و الحيّ..
و الدخان..
أكدب عليكى لو قلتلك ندمان..
لاكن انا عيّان...
بحب الوطن...
و بذكريات المعركة الدايرة...
و بخوفى م النسيان ...
و بحُبِك إنتى كمان...